常餐A - 跟烏冬

常餐A - 跟烏冬

文章日期：03/26/2012 08:57 pm

昨晚突然發燒兼喉嚨勁痛，今日番工痛到冇乜心機。 本來諗住睌餐求其煮個烏冬就算架啦。點知大夫話不如吃D花膠滋陰下增強體質 (都唔知係咪應該病緊食既，佢都唔係開呢番既!  ) ，不過唔緊要返正我都唔識咪信下佢law, 於是在佢既提議下就用左半個鐘整左呢個最強既富貴大夫常餐A - 浮誇烏冬嚟補補啦！

材料：

花膠
冬菇
罐頭鮑魚
蠔鼓
排骨
清雞湯
蠔油
烏冬
薑

時間關係，冬菇和蠔鼓可加熱水放入微波爐叮8-10分鐘令其變軟。花膠切成件狀。

在煲內放入少許油，落薑片和排骨爆香。加入冬菇、蠔鼓、花膠同鮑魚，再注入雞湯、水和少許蠔油調味。蓋上蓋炆大概30分鐘，熄火。

在另一個煲內注入水，加入雞湯湯底，放入烏冬煮熟。

最后將烏冬同湯底放入碗中並倒入已炆好既料連汁就做好呢碗'浮誇'烏冬啦！

真係未食過咁高級既烏冬，講真 ：又真係好鬼好味，個湯底好＂膠＂呀！成個人醒晒！大夫既＂醫術＂真係高明，好野！

常餐A 呢個名都係大夫命名既，真係夠晒 "浮誇"！！！